Feijóo presidente

A experiencia piloto de Núñez Feijóo. Fotografía: Marcos Sanluis

A victoria do PP e de Núñez Feijóo é incuestionable: con máis participación, con maioría absoluta e cun importante aumento de apoios nas cidades.
Pero a derrota do bipartito tamén é incuestionable. O electorado castigou o goberno de dous, o escaso pulo ó cambio, o gusto pola ostentación e o afastamento da realidade. Touriño pagou cara a súa soberbia e a súa falla de liderado. A súa campaña é o reflexo da súa acción de goberno: presidencialismo e pouco máis. O xa ex secretario xeral do PSdeG desbotou a súa principal arma: as siglas. Quintana sofre hoxe a derrota de onte. En 2005 o BNG rexistrou un importante descenso de apoios ó pasar de 17 a 13 escanos. O feito de entrar no goberno eclipsou totalmente ese dato que os nacionalistas pretendían mellorar rendibilizando o seu paso pola Xunta con áreas de goberno tan pegadas á xente como Benestar ou Vivenda. Lonxe diso, perdeu un escano. Quintana colleu o BNG con 17 deputados e déixao -aínda non- con 12. O Consello Nacional decidirá o seu futuro. Galicia case non lle dá oportunidades á esquerda e, para unha que ten, desaprovéitaa. Na noite electoral dicía alguén do equipo de Touriño que o país non estaba preparado para este goberno. Quen non estaban preparados eran eles.

A imaxe foi tomada na Illa de Arousa.