PP, PSOE e BNG xa actúan en Galicia en clave de partido

Insiste o presidente Touriño en que non haberá eleccións anticipadas en Galicia, pero os acontecementos políticos dos últimos días mostran a dirixentes que tensan a corda e que parecen querer abrir xa a longa carreira a monte Pío.
Equivocáronse os alcaldes do PP coas súas críticas, e mesmo descualificacións, ós acordos coa Vicepresidencia para a implantación da rede de galescolas. É sorprendente que un rexedor asine un convenio, para poñelo a parir transcorridos varios días. Pero equivocouse tamén Anxo Quintana coa súa resposta: é lexítimo que se defenda da censura e, especialmente, da descualificación, pero é reprobable que rache uns convenios supostamente beneficiosos para os cidadáns por ataques á súa persoa. Se me criticas, quedas sen galescola. Á marxe das consideracións legais, Quintana emprega os colexios infantís coma se fosen seus e non dos cidadáns. Equivocouse tamén o voceiro socialista no Parlamento de Galicia, Ismael Rego, cando decidiu non acudir á reunión convocada por Quintana para falar de financiamento autonómico. Se o vicepresidente da Xunta convoca os grupos parlamentarios, a súa obriga é asistir a ese encontro, aínda que só sexa para dicirlle a Quintana que non están de acordo coa súa proposta. Dá a sensación de que os dirixentes políticos galegos están pensando máis nas eleccións autonómicas ca en resolver os problemas dos cidadáns. ¿En clave de país? En clave de partido.